نائب وزیراعظم اور وزیر خارجہ اسحاق ڈار نے کہا ہے کہ آبنائے ہرمز سے پاکستانی پرچم بردار مزید 20 جہازوں کو گزرنے کی اجازت دے دی گئی ہے، جس کے تحت روزانہ دو جہاز اس راستے سے عبور کریں گے۔
اپنے بیان میں انہوں نے کہا کہ یہ پیشرفت خطے میں صورتحال میں بہتری کی علامت ہے اور اسے مثبت اور تعمیری اقدام کے طور پر دیکھا جانا چاہیے۔ ان کے مطابق اس اقدام سے خطے میں امن اور استحکام کے فروغ میں مدد ملے گی۔
اسحاق ڈار نے کہا کہ یہ پیش رفت امن کی جانب ایک اہم قدم ہے جو علاقائی سطح پر جاری سفارتی کوششوں کو مزید تقویت دے گی۔
انہوں نے مزید کہا کہ خطے میں آگے بڑھنے کا واحد راستہ مذاکرات، سفارتکاری اور باہمی اعتماد سازی ہے، اور انہی اصولوں کے تحت دیرپا استحکام حاصل کیا جا سکتا ہے۔
