پاکستان انٹرنیشنل ایئرلائن (پی آئی اے) نے مسافروں کو عالمی معیار کی سفری سہولت فراہم کرنے کے لیے کینیڈا اور برطانیہ کی معروف ریل سروسز کے ساتھ ایک تاریخی ایئر ٹو ریل معاہدہ کر لیا ہے۔اس اشتراک کے تحت مسافر ایک ہی ٹکٹ پر ہوائی اور ٹرین کے ذریعے اپنا سفر مکمل کر سکیں گے، جس سے سفری سہولت، وقت کی بچت اور آرام میں نمایاں اضافہ ہوگا۔ترجمان پی آئی اے کے مطابق، پی آئی اے کی پروازوں کے ذریعے ٹورنٹو پہنچنے والے مسافر وہاں سے پارٹنر ایسیس ریل سروس کے ذریعے کینیڈا کے آٹھ اہم شہروں تک اپنا سفر بآسانی جاری رکھ سکیں گے۔اسی طرح برطانیہ کیلئے مانچسٹر اورلندن جانے والے پی آئی اے کے مسافر ایسیس ریل سروس کے ذریعے 50 سے زائد شہروں تک رسائی حاصل کر سکیں گے، جس سے انہیں علیحدہ علیحدہ ٹکٹ خریدنے کی ضرورت نہیں رہے گی۔
پاکستان اور یو اے ای کے درمیان پری امیگریشن کلیئرنس پر اتفاق
ترجمان نے بتایا کہ اس جدید سہولت کے تحت مسافر اپنی منزل مقصود تک کے ٹکٹ پی آئی اے کے تمام بکنگ دفاتر، رجسٹرڈ ٹریول ایجنٹس، پی آئی اے کی باضابطہ ویب سائٹ اور موبائل ایپلیکیشن کے ذریعے حاصل کر سکتے ہیں۔معاہدے کا بنیادی مقصد مسافروں کوان کے گھر کی دہلیز تک آرام دہ، محفوظ اورمربوط سفری سہولت فراہم کرنا ہے۔ اس اقدام سے نہ صرف مسافروں کا قیمتی وقت بچے گا بلکہ سفرمزید آسان اورمؤثرہو جائے گا۔پی آئی اے کا یہ ایئر ٹو ریل اشتراک ادارے کے نیٹ ورک کو ڈیجیٹل اور جدید خطوط پر استوار کرنے کی جانب ایک اہم اور تاریخی قدم قرار دیا جا رہا ہے۔
