ایران کے پاسدارانِ انقلاب کے ترجمان کی جانب سے دعویٰ کیا گیا ہے کہ صوبہ اصفہان کے جنوبی علاقے میں مبینہ امریکی فوجی کارروائی کے دوران دو سی 130 طیارے اور دو بلیک ہاک ہیلی کاپٹر تباہ کر دیے گئے۔
ایرانی میڈیا کے مطابق یہ واقعہ اس وقت پیش آیا جب امریکی افواج ایک گرائے گئے لڑاکا طیارے کے لاپتا عملے کی تلاش اور ریسکیو آپریشن میں مصروف تھیں۔
رپورٹس میں مزید کہا گیا ہے کہ اس سے قبل بھی اسی آپریشن کے دوران ایک سی 130 طیارے کو نشانہ بنانے کی اطلاعات سامنے آئی تھیں، تاہم اب مزید فضائی اثاثوں کو تباہ کرنے کا دعویٰ کیا گیا ہے۔
ایرانی ترجمان کے مطابق دفاعی نظام نے امریکی فوجی نقل و حرکت کو بروقت نشانہ بنایا، جبکہ اس کارروائی میں دشمن کو بھاری نقصان پہنچانے کا دعویٰ بھی کیا گیا ہے۔
دوسری جانب امریکی حکام کی جانب سے ان دعوؤں پر تاحال کوئی باضابطہ ردعمل سامنے نہیں آیا۔
سیاسی و عسکری ماہرین کے مطابق اگر ان دعوؤں کی آزاد ذرائع سے تصدیق ہو جاتی ہے تو خطے میں جاری کشیدگی میں مزید اضافہ ہو سکتا ہے اور صورتحال مزید پیچیدہ رخ اختیار کر سکتی ہے۔
