کینیڈا اوٹاوا محبوب شیخ —کینیڈا میں تعینات پاکستان کے ہائی کمشنر محمد سلیم نے اوٹاوا میں رائل کالج آف فزیشنز اینڈ سرجنز آف کینیڈا (RCPSC) کے ایگزیکٹو ڈائریکٹر اور چیف آپریٹنگ آفیسر مسٹر کریگ سیپیٹیلی سے ملاقات کی۔
ملاقات کے دوران پاکستان اور کینیڈا کے درمیان صحت کے شعبے میں پیشہ ورانہ تربیت اور استعداد کار بڑھانے کے مواقع پر تفصیلی تبادلۂ خیال کیا گیا۔ خاص طور پر پوسٹ گریجویٹ میڈیکل ایجوکیشن، ایکریڈیٹیشن کے معیار اور اسپیشلسٹ تربیتی پروگرامز میں تعاون پر گفتگو ہوئی۔
اس موقع پر رائل کالج آف فزیشنز اینڈ سرجنز آف کینیڈا اور پاکستان میں اس کے ہم منصب ادارے، کالج آف فزیشنز اینڈ سرجنز آف پاکستان (CPSP)، کے درمیان ادارہ جاتی روابط قائم کرنے کے امکانات پر بھی بات چیت کی گئی۔
ہائی کمشنر محمد سلیم نے اپنے کینیڈین ہم منصب کو فروری 2026 میں کراچی، پاکستان میں منعقد ہونے والی انٹرنیشنل میڈیکل ایجوکیشن کانفرنس کے بارے میں آگاہ کیا اور کینیڈین اداروں کو اس میں شرکت کی دعوت دی۔ملاقات میں ہونے والی گفتگو دونوں ممالک کے درمیان صحت کی تعلیم کو مضبوط بنانے اور پیشہ ورانہ تبادلوں کے فروغ کے مشترکہ عزم کی عکاس تھی۔
