جنوبی بھارت کی مشہور اداکارہ Nayanthara کے بارے میں توہین آمیز بیان پر تامل ناڈو میں تنازع پیدا ہوگیا ہے۔ واقعہ اس وقت سامنے آیا جب اے آئی اے ڈی ایم کے رکن پارلیمنٹ C. V. Shanmugam نے خواتین کے تحفظ سے متعلق ریلی کے دوران اداکارہ کے بارے میں متنازع ریمارکس دیے۔
انہوں نے کہا، ’’میں نین تارا کو چاہتا ہوں، کیا وزیر اعلیٰ کسی کا خواب پورا کریں گے کہ میں نین تارا سے شادی کروں؟‘‘ اس بیان پر حکومتی رہنماؤں اور فلمی حلقوں نے سخت ردعمل دیا۔
ساؤتھ انڈین فلم آرٹسٹس ایسوسی ایشن (SIA) نے شنموگم کے بیان کو ’’شرمناک اور قابل مذمت‘‘ قرار دیتے ہوئے کہا کہ عوامی نمائندوں کو اپنی زبان میں وقار اور ذمہ داری کا مظاہرہ کرنا چاہیے، لیکن اس معاملے میں پارلیمانی آداب کی خلاف ورزی ہوئی اور نین تارا کو بلاوجہ اپنی تقریر میں گھسیٹا گیا۔
تنظیم نے کہا کہ عوام کے خواب غربت کے خاتمے، تعلیم، روزگار اور سلامتی سے متعلق ہوتے ہیں نہ کہ کسی اداکارہ سے شادی کے بارے میں۔ ایسوسی ایشن نے سوال اٹھایا کہ جب خواتین سیاست، سائنس، طب اور دیگر شعبوں میں نمایاں کردار ادا کر رہی ہیں تو فلمی صنعت کی خواتین کو نشانہ بنانا کس سیاسی شرافت کا حصہ ہے؟
ساؤتھ انڈین فلم آرٹسٹس ایسوسی ایشن نے شنموگم سے فوری معافی کا مطالبہ کیا اور آئندہ خواتین کے بارے میں غیر ذمہ دارانہ ریمارکس نہ دینے کی یقین دہانی کرانے کا کہا۔
