ایران نے امریکا کی جانب سے دیگر ممالک پر تہران کے ساتھ اقتصادی تعلقات محدود کرنے کے لیے دباؤ ڈالنے کے منصوبے کو مسترد کرتے ہوئے کہا ہے کہ آزاد ممالک اپنے مفادات اور ترجیحات کے مطابق ایران کے ساتھ تعلقات کا فیصلہ خود کریں گے۔
ایرانی نائب وزیر خارجہ کاظم غریب آبادی نے سوشل میڈیا پلیٹ فارم ایکس پر بیان میں امریکی وزیر خزانہ اسکاٹ بیسنٹ کے اس مؤقف پر ردعمل دیا، جس میں انہوں نے کہا تھا کہ امریکا نے مختلف ممالک پر ایران کو معاشی طور پر تنہا کرنے کے لیے اپنے نمائندے بھیجے ہیں۔غریب آبادی نے کہا کہ امریکی وزیر خزانہ ایسے انداز میں بات کر رہے ہیں جیسے پوری دنیا امریکا کا ’پچھواڑا‘ ہو۔ ان کے مطابق خودمختار حکومتیں ایران کے ساتھ اپنے اقتصادی اور تجارتی تعلقات کا فیصلہ اپنے مفادات کی بنیاد پر کرتی ہیں، نہ کہ امریکی محکمہ خزانہ کے احکامات پر۔ایرانی نائب وزیر خارجہ نے مزید کہا کہ دھمکیوں اور پابندیوں کے ذریعے اپنی مرضی دوسروں پر مسلط کرنے کا دور ختم ہونے کے قریب ہے۔ ان کا یہ بیان امریکا کی جانب سے ایران کی فضائی اور مالی سرگرمیوں پر دباؤ بڑھانے کی حالیہ کوششوں کے بعد سامنے آیا ہے۔امریکی وزیر خزانہ اسکاٹ بیسنٹ نے حال ہی میں کہا تھا کہ ان کی ہدایت پر مختلف ممالک سے رابطوں کے لیے ٹیمیں دنیا بھر میں بھیجی گئی ہیں اور واشنگٹن ایران کو معاشی طور پر تنہا کرنے کی کوشش کر رہا ہے۔
