اسٹیفن اوسٹاکیو کے سنسنی خیز گول نے قوم کو خوشی سے جھومنے پر مجبور کر دیا — سرخ و سفید پرچموں میں ڈوبا کینیڈا، نئی تاریخ رقم
رپورٹ: محبوب علی شیخ
کینیڈا نے فیفا ورلڈ کپ 2026 میں ایک ایسا تاریخی لمحہ رقم کر دیا جس نے پورے ملک کو خوشی، فخر اور جذبات کے سمندر میں ڈبو دیا۔ لاس اینجلس میں کھیلے گئے ناک آؤٹ مرحلے کے سنسنی خیز مقابلے میں کینیڈا نے جنوبی افریقہ کو صفر کے مقابلے میں ایک گول سے شکست دے کر اگلے مرحلے کیلئے کوالیفائی کر لیا۔
فیصلہ اُس وقت ہوا جب انجری ٹائم کے دوسرے منٹ میں اسٹیفن اوسٹاکیو نے شاندار فاتحانہ گول داغ دیا۔ گول ہوتے ہی اسٹیڈیم نعروں سے گونج اٹھا اور لاکھوں کینیڈین مداح خوشی سے جھوم اٹھے۔
ٹورنٹو، وینکوور، مونٹریال اور ملک کے دیگر شہروں میں FIFA Fan Festivals خوشیوں کے مراکز بن گئے۔ سڑکیں قومی پرچموں سے سج گئیں، مداح رقص کرتے، نعرے لگاتے اور ایک دوسرے کو مبارکباد دیتے نظر آئے۔ سرخ اور سفید رنگ میں رنگا ہوا کینیڈا ایک تاریخی جشن میں تبدیل ہو گیا۔
مونٹریال کے کیفے، کھیلوں کے مراکز اور عوامی مقامات پر آخری سیٹی بجتے ہی تالیاں، قومی ترانے اور “اولے اولے” کے فلک شگاف نعروں نے ماحول کو ناقابلِ فراموش بنا دیا۔ کئی شائقین کا کہنا تھا کہ ایسا محسوس ہوا جیسے پورا ملک ایک ہی دل کی دھڑکن بن گیا ہو۔
وینکوور کے فین فیسٹیول میں شریک شائقین نے اپنے خاندانوں کے ساتھ تاریخی لمحہ دیکھا اور گول کے فوراً بعد خوشی کی چیخیں، گلے ملنے اور جشن کے مناظر دیکھنے کو ملے۔
میچ کے دوران کپتان الفانسو ڈیویز کی آمد نے بھی ماحول میں نئی توانائی بھر دی اور شائقین کے جوش کو مزید بڑھا دیا۔
میچ کے بعد کینیڈین کوچ جیسی مارش نے کھلاڑیوں سے جذباتی خطاب کرتے ہوئے کہا کہ تم لوگ صرف میچ نہیں جیتے… تم کینیڈا کے ہیرو بن گئے ہو۔ تم نے آنے والی نسلوں کیلئے خوابوں کے دروازے کھول دیے ہیں۔
ماہرین کے مطابق یہ صرف ایک فتح نہیں بلکہ کینیڈین فٹبال کے نئے دور کا اعلان ہے۔ چند سال پہلے تک عالمی سطح پر کم نمایاں سمجھی جانے والی ٹیم آج دنیا کی مضبوط ٹیموں کو چیلنج کرتی نظر آ رہی ہے۔
اس ورلڈ کپ میں کینیڈا نے مسلسل متاثر کن کارکردگی دکھائی اور اب قوم کی نظریں اگلے تاریخی معرکے پر مرکوز ہیں۔
اب پورا کینیڈا 4 جولائی کا انتظار کر رہا ہے، جب ٹیم اگلے مرحلے میں ایک اور بڑا امتحان دے گی۔
واضح رہے کہ ورلڈ کپ کے دوران کینیڈا نے بوسنیا و ہرزیگووینا کے خلاف تاریخی پوائنٹ حاصل کیا، قطر کو 0-6 سے شکست دی اور اب جنوبی افریقہ کو ناک آؤٹ مرحلے میں ہرایا یہ کامیابیاں اس بات کا ثبوت ہیں کہ ملک میں فٹبال تیزی سے مقبول ہو رہا ہے۔
