اگر آپ جسمانی طور پر فٹ رہنے والے لوگوں سے پوچھیں کہ وہ صحت مند رہنے کے لیے کیا کرتے ہیں تو ممکن ہے وہ کہیں کہ وہ گھنٹوں جم میں ورزش کرتے ہیں۔ لیکن ایک نئی تحقیق کے مطابق روزانہ سیڑھیاں چڑھنے کی عادت دل کی بیماری سے موت کے خطرے کو 39 فیصد تک کم کر سکتی ہے۔
تحقیق سے معلوم ہوا ہے کہ روزانہ لفٹ یا ایسکلیٹر کے بجائے سیڑھیاں استعمال کرنے کی معمولی سی عادت بھی زندگی کو طول دینے میں مددگار ثابت ہو سکتی ہے۔
برطانیہ کی یونیورسٹی آف ایسٹ اینگلیا کے محققین نے اس حوالے سے 9 تحقیق سے حاصل ہونے والے اعداد و شمار کا تجزیہ کیا، جن میں 4 لاکھ 50 ہزار سے زائد افراد شامل تھے۔
محققین نے مجموعی طور پر دیکھا کہ جو لوگ باقاعدگی سے سیڑھیاں استعمال کرتے تھے، ان میں دل کی بیماری کے باعث موت کا خطرہ ان افراد کے مقابلے میں 39 فیصد کم تھا جو سیڑھیاں استعمال نہیں کرتے تھے۔
شرکا کا اوسطاً 14 سال تک جائزہ لینے کے دوران یہ بھی معلوم ہوا کہ سیڑھیاں استعمال کرنے والوں میں کسی بھی وجہ سے موت کا خطرہ لفٹ استعمال کرنے والوں کے مقابلے میں 24 فیصد کم تھا۔
اس تحقیق میں شامل ماہر امراض قلب ڈاکٹر سوفی پیڈوک نے کہا کہ ہم نے سیڑھیاں چڑھنے اور دل کی بیماری کے باعث موت سمیت مجموعی طور پر موت کے کم خطرے کے درمیان مسلسل تعلق پایا۔ انہوں نے کہا کہ جم جانے یا باقاعدہ ورزش کرنے کے برعکس سیڑھیاں چڑھنا ایک ایسی سرگرمی ہے جسے گھر، دفتر یا باہر روزمرہ زندگی میں باآسانی شامل کیا جا سکتا ہے۔
انکا مزید کہنا تھا کہ اگر آپ کے سامنے سیڑھیاں اور لفٹ میں سے کسی ایک کا انتخاب ہو تو سیڑھیوں کا انتخاب کریں۔ جسمانی سرگرمی کے مختصر دورانیے بھی دل کی صحت پر مثبت اثرات مرتب کر سکتے ہیں۔ محققین نے یہ واضح نہیں کیا کہ دل کی صحت کے فوائد حاصل کرنے کے لیے کسی شخص کو کتنی بار سیڑھیاں چڑھنے کی ضرورت ہے۔ ان کا کہنا تھا کہ اس حوالے سے مزید تحقیق کی ضرورت ہے۔
