خصوصی رپورٹ: محبوب علی شیخ
نیویارک: دنیا کی مشہور ایمپائر اسٹیٹ بلڈنگ پر پیش آنے والے ایک سنسنی خیز واقعے نے لاکھوں لوگوں کو حیران کر دیا، جب روس سے تعلق رکھنے والے ایک معروف جوڑے نے مبینہ طور پر شادی کی پیشکش کے لیے 1454 فٹ (443 میٹر) بلند عمارت کے انتہائی محفوظ اینٹینا تک رسائی حاصل کر لی۔ خطرناک بلندی پر محبت کے اظہار کے چند ہی لمحوں بعد دونوں کو نیویارک پولیس نے گرفتار کر لیا۔
عینی شاہدین اور فضائی ویڈیوز کے مطابق دونوں افراد نے اینٹینا کی چوٹی پر ایک بینر بھی لہرایا جس پر درج تھا:
“When the power of love beats the love of power, the world knows peace.”
“جب محبت کی طاقت، طاقت کی محبت پر غالب آ جائے تو دنیا حقیقی امن کو پہچانتی ہے۔”
یہ حیرت انگیز منظر دیکھنے والوں کے لیے خوف، تجسس اور حیرانی کا باعث بن گیا جبکہ سوشل میڈیا پر اس کی ویڈیوز تیزی سے وائرل ہو گئیں۔
پولیس کے مطابق گرفتار ہونے والے افراد Angela Nikolau اور Ivan Beerkus ہیں، جو دنیا بھر میں بلند ترین عمارتوں پر بغیر اجازت چڑھنے کی وجہ سے شہرت رکھتے ہیں اور 2024 کی معروف ڈاکیومنٹری “Skywalkers: A Love Story” کے مرکزی کردار بھی رہ چکے ہیں۔
ویڈیو فوٹیج میں دیکھا جا سکتا ہے کہ نیچے اترتے ہوئے مرد ساتھی ایک گھٹنے پر بیٹھ کر شادی کی پیشکش کرتا ہے، جس کے بعد خاتون اپنی منگنی کی انگوٹھی دکھاتے ہوئے خوشی کا اظہار کرتی ہے۔ اسی دوران پولیس اہلکار اینٹینا تک پہنچ جاتے ہیں۔
پولیس کی باڈی کیم ویڈیو میں ایک افسر نے مسکراتے ہوئے کہا:
“Well, you can’t be up here.”
جس پر جواب ملا:
“We are engaged.”
“ہم اب منگنی کر چکے ہیں۔”
نیویارک پولیس نے دونوں کے خلاف غیرقانونی داخلہ (Burglary)، دوسروں کی جان خطرے میں ڈالنے (Reckless Endangerment) سمیت متعدد فوجداری الزامات عائد کر دیے ہیں، جبکہ تحقیقات جاری ہیں کہ وہ عمارت کے انتہائی محفوظ حصے تک پہنچنے میں کامیاب کیسے ہوئے۔
ایمپائر اسٹیٹ بلڈنگ کی انتظامیہ نے واضح کیا کہ یہ کارروائی مکمل طور پر غیر مجاز تھی، اگرچہ عمارت کے اندر موجود افراد کسی خطرے میں نہیں آئے، تاہم واقعے کے بعد سکیورٹی انتظامات کا ازسرنو جائزہ لیا جا رہا ہے۔
واقعے کے وقت آبزرویشن ڈیک پر موجود کئی سیاحوں نے بتایا کہ انہوں نے جوڑے کو ایک محدود علاقے میں داخل ہوتے دیکھا، مگر انہیں گمان ہوا کہ شاید وہ عمارت کے عملے کا حصہ ہیں۔ حفاظتی اقدامات کے تحت کچھ دیر کے لیے عمارت کے مخصوص حصے بند بھی کر دیے گئے۔
ماہرین کا کہنا ہے کہ سوشل میڈیا پر شہرت حاصل کرنے کی دوڑ بعض افراد کو ایسے خطرناک اقدامات پر آمادہ کر رہی ہے جو نہ صرف ان کی اپنی جان بلکہ دوسروں کی سلامتی کو بھی خطرے میں ڈال سکتے ہیں۔ ان کے مطابق ایسے واقعات نوجوانوں میں Copycat Behavior کو فروغ دیتے ہیں، اسی لیے دنیا بھر میں ان کے خلاف سخت قانونی کارروائی کی جاتی ہے۔
یہ واقعہ ایک بار پھر یہ سوال اٹھا رہا ہے کہ کیا چند لمحوں کی سوشل میڈیا شہرت کے لیے اپنی جان اور آزادی کو داؤ پر لگانا واقعی محبت ہے یا محض جنون؟
