20 سال بعد کینیڈین وزیر خارجہ انیتا آنند کا تاریخی دورۂ پاکستان تجارت، سرمایہ کاری اور کینولا معاہدوں سے نئے اقتصادی دور کا آغاز
وزیر خارجہ انیتا آنند کے تاریخی دورے سے سرمایہ کاری اور تجارت کے نئے دروازے کھل گئے۔
کینولا آئل، معدنیات، توانائی اور جدید ٹیکنالوجی میں اربوں ڈالر کے مواقع۔
دو دہائیوں بعد سفارت کاری سے معاشی شراکت داری کے نئے دور کا آغاز۔
خصوصی رپورٹ: محبوب علی شیخ
کینیڈا کی وزیر خارجہ انیتا آنند کے تاریخی دورۂ پاکستان نے دونوں ممالک کے تعلقات میں ایک نئے باب کا اضافہ کر دیا۔ یہ تقریباً 20 سال بعد کسی کینیڈین وزیر خارجہ کا پاکستان کا پہلا سرکاری دورہ ہے، جسے دونوں ممالک نے تجارت، سرمایہ کاری اور اقتصادی تعاون کو نئی بلندیوں تک لے جانے کے لیے ایک اہم سنگِ میل قرار دیا ہے۔
کینیڈا اور پاکستان نے تجارت، سرمایہ کاری اور اقتصادی تعاون کو مزید فروغ دینے پر اتفاق کیا ہے، جس کے تحت زراعت، توانائی، کان کنی، قابلِ تجدید توانائی اور آٹوموٹو صنعت سمیت اہم شعبوں میں تعاون کو وسعت دی جائے گی۔
اسلام آباد کے دورے کے دوران کینیڈا کی وزیر خارجہ انیتا آنند نے پاکستان کے وزیراعظم شہباز شریف سے ملاقات کی اور کینیڈا کے وزیراعظم مارک کارنی کی جانب سے نیک خواہشات کا پیغام پہنچایا۔ ملاقات میں دوطرفہ تعلقات کو مزید مضبوط بنانے اور اقتصادی ترقی کے نئے مواقع پیدا کرنے پر تفصیلی تبادلۂ خیال کیا گیا۔
دونوں ممالک نے سرمایہ کاری میں اضافے کے مختلف طریقوں کا جائزہ لیا اور فارن انویسٹمنٹ پروموشن اینڈ پروٹیکشن ایگریمنٹ (FIPPA) پر بھی بات چیت کی، جس سے سرمایہ کاروں کے اعتماد میں مزید اضافہ متوقع ہے۔ اس کے علاوہ، کینیڈا اور پاکستان نے تجارت اور معدنیات کے شعبوں سے متعلق وفود کے تبادلے پر بھی اتفاق کیا تاکہ تعاون کے نئے مواقع تلاش کیے جا سکیں۔
اس دورے کی ایک اہم کامیابی پاکستان میں کینیڈا سے درآمد کیے جانے والے کینولا کے لیے فائیٹو سینیٹری (Phytosanitary) تقاضوں سے متعلق پروٹوکول پر دستخط تھے، جس سے دونوں ممالک کے درمیان زرعی تجارت کو مزید فروغ ملے گا۔
وزیراعظم شہباز شریف نے تجارت اور سرمایہ کاری کے شعبوں میں کینیڈا کے ساتھ تعلقات کو مزید وسعت دینے کے پاکستان کے عزم کا اعادہ کیا اور اس امید کا اظہار کیا کہ مستقبل قریب میں ان کی کینیڈا کے وزیراعظم مارک کارنی سے ملاقات ہوگی۔
دورے کے دوران کینیڈا کی وزیر خارجہ انیتا آنند نے وزیراعظم شہباز شریف، نائب وزیراعظم و وزیر خارجہ اسحاق ڈار اور دیگر اعلیٰ حکام سے ملاقاتیں کیں، جن میں دوطرفہ تجارت، سرمایہ کاری، علاقائی تعاون اور اقتصادی شراکت داری کو مزید وسعت دینے پر اتفاق کیا گیا۔ دونوں ممالک نے سرمایہ کاری کے فروغ کے لیے متعدد شعبوں میں تعاون بڑھانے پر اتفاق کیا، جن میں خاص طور پر معدنیات اور Critical Minerals، کان کنی (Mining) اور معدنی خدمات ، زراعت اور زرعی ٹیکنالوجی ، فوڈ سکیورٹی ، توانائی ، انفراسٹرکچر ، تجارت و سرمایہ کاری ، نجی شعبے کے اشتراک شامل ہیں۔
سرمایہ کاروں کے تحفظ کے لیے Foreign Investment Promotion and Protection Agreement (FIPPA) پر جاری مذاکرات شامل ہیں۔ اس موقع پر پاکستان اور کینیڈا کے درمیان کینیڈین کینولا (Canola) کی پاکستان درآمد سے متعلق فائیٹو سینیٹری پروٹوکول پر بھی دستخط کیے گئے، جس سے زرعی تجارت کو مزید فروغ ملے گا۔ سرکاری اعداد و شمار کے مطابق 2025 کے آخر سے اب تک پاکستان کو کینیڈین کینولا کی برآمدات کی مالیت تقریباً 426 ملین کینیڈین ڈالر تک پہنچ چکی ہے، جبکہ 2025 میں دونوں ممالک کے درمیان مجموعی دوطرفہ تجارتی حجم تقریباً 1.2 ارب کینیڈین ڈالر رہا۔
ماہرین کے مطابق یہ دورہ نہ صرف سفارتی تعلقات بلکہ تجارت، سرمایہ کاری، معدنی وسائل، زراعت اور توانائی کے شعبوں میں بھی نئی راہیں کھولے گا، جس سے پاکستان اور کینیڈا کے درمیان اقتصادی شراکت داری مزید مضبوط ہونے کی توقع ہے۔
