سیمی فائنل کی جنگ شروع، فرانس، اسپین، دفاعی چیمپئن ارجنٹینا اور انگلینڈ میں عالمی تاج کی فیصلہ کن دوڑ
رپورٹ: محبوب علی شیخ
فیفا ورلڈ کپ 2026 اپنے فیصلہ کن مرحلے میں داخل ہو چکا ہے اور اب دنیا کی نظریں صرف چار طاقتور ٹیموں پر مرکوز ہیں۔ پہلا سیمی فائنل کل فرانس اور اسپین کے درمیان کھیلا جائے گا، جبکہ دوسرا سیمی فائنل 15 جولائی کو دفاعی چیمپئن ارجنٹینا اور انگلینڈ کے درمیان ہوگا۔ عالمی چیمپئن کا فیصلہ 19 جولائی بروز اتوار کو ہونے والے گرینڈ فائنل میں ہوگا، جہاں فٹبال کی تاریخ کا ایک اور سنہری باب رقم کیا جائے گا۔
فیفا ورلڈ کپ 2026 نے جہاں شاندار فٹبال، حیران کن اپ سیٹس، تاریخی مقابلوں اور ناقابلِ یقین گولز سے دنیا بھر کے شائقین کو مسحور کیا، وہیں کچھ متنازع فیصلے بھی عالمی بحث کا مرکز بنے۔ اس کے باوجود تینوں میزبان ممالک کینیڈا، امریکہ اور میکسیکو نے اپنی مثالی میزبانی سے دنیا بھر کے فٹبال شائقین کے دل جیت لیے۔
خصوصاً ٹورنٹو اور وینکوور لاکھوں بین الاقوامی شائقین کی توجہ کا مرکز بنے، جہاں مہمان نوازی، سیکیورٹی، ماحول اور انتظامات کو عالمی سطح پر بے حد سراہا گیا۔ امریکہ اور میکسیکو کے اسٹیڈیم بھی ہر میچ میں شائقین کے جوش و خروش سے بھرے رہے، جس نے اس ورلڈ کپ کو تاریخ کے یادگار ترین ٹورنامنٹس میں شامل کر دیا۔
غانم المفتاح کی موجودگی نے دل جیت لیے
فیفا ورلڈ کپ 2026 کے یادگار لمحات میں قطر کے معروف موٹیویشنل اسپیکر اور عالمی شہرت یافتہ شخصیت غانم المفتاح (Ghanim Al-Muftah) کی موجودگی بھی شامل رہی۔
انہوں نے لاس اینجلس میں ہونے والی فیفا ورلڈ کپ 2026 کی افتتاحی تقریب میں شرکت کی۔ وہ امریکہ اور پیراگوئے کے افتتاحی میچ کے دوران بھی اسٹیڈیم میں موجود رہے، جبکہ ٹورنامنٹ کے دوران ان کی فیفا کے صدر جیانی انفانٹینو (Gianni Infantino) سے ملاقات بھی ہوئی۔
غانم المفتاح کی موجودگی نے دنیا بھر میں امید، حوصلے اور عزم کا پیغام دیا۔ ان کی شخصیت ایک بار پھر اس حقیقت کی یاد دہانی بن گئی کہ جسمانی محدودیاں انسان کے خوابوں کی راہ میں رکاوٹ نہیں بن سکتیں۔
اب پوری دنیا کی نظریں سیمی فائنلز اور گرینڈ فائنل پر مرکوز ہیں، جہاں صرف ایک ٹیم عالمی چیمپئن بنے گی، مگر فیفا ورلڈ کپ 2026 اپنے جذبات، ڈرامے، ریکارڈز، حیرت انگیز لمحات اور عالمی یکجہتی کے پیغام کے باعث ہمیشہ تاریخ میں سنہرے الفاظ میں یاد رکھا جائے گا.
